Unibertsitate garaian ezagutu zuen technoa, eta Palestinako errealitatetik ihes egiteko era izan zen harentzat. Hala, herrialdeko lehenengo disko jartzailea eta musika ekoizlea bilakatu zen.
Skywalker izen artistikoa jarri zion bere buruari, nahiz eta Star Wars sagako film bakarra ere ez zuen ikusia. Orain, SAMA’ da; Palestinako lehenengo DJa. Herrialdetik kanpo jaio zen Sama Abdulhadi (Amman, Jordania, 1991), eta, horri esker, sartu-irtenean ibili da Israelek okupatutako lurretan. Gaztetan, elektronika festak antolatzen hasi zen Ramallah hirian, baina inork ere ez zuen ulertu zer ari zen egiten.