Abuztuaren 30etik irailaren 1era egingo da Donostian Dantz jaialdia, musika garaikide eta elektronikoaren topagunea. Giroa berotzen hasteko, hilaren 18an 12 orduko festa antolatu dute Guardetxean, 18:00etatik 06:00etara
Abuztuaren 30etik irailaren 1era egingo da Donostiako Tabakaleran, Gazteszenan eta hiriko hainbat klubetan Dantz jaialdia, musika garaikide eta elektronikoaren topagunea. Eslovenia, Argentina, Palestina edota Turkiatik etorritako nazioarteko artistak ariko dira hiru egun horietan, eta Euskal Herrian musika elektronikoaren arloan egiten denaren erakusleiho ere izango da topaketa. Jaialdia, baina, ez da hiru egun horietara mugatuko. Warm Up deiturapean, abuztuaren 3 eta 11n, jaialdia hasi aurretik, hainbat saio eskainidituzte Donostiako zenbait lokaletan.
Hirugarren saioa asteburu honetan izango da, hilaren 18an. Guardetxean, 15:00etatik 06:00etara, musikari ugari ariko dira, THG «techno House & Groove» kolektiboarekin elkarlanean antolatutako saioan. Jaialdiaren hasiera egunean bertan, abuztuaren 30ean, 19:00etan, Groseko Txiringiton ariko dira Ope Loeb&Kino Internacional&Piek .
Antolatzaileek diotenez, «abangoardia, musika esperimentala eta musika elektronikoa» eskaini nahi dituzte, baina ikuskizunaz edo festaz haragoko ikuspegitik. Aurten, hain zuzen, «aukeratutako artistak beren diskurtso artistiko edota kondizioengatik hautatuak izan dira», «gai eta kezka garaikide eta globalak azaleratu eta hausnartzera eraman» nahi dituztelako.
Abuztuaren 30tik irailaren 1 arte, batez ere Tabakaleran eta Gazteszenan ospatuko den jaialdirako, bi aste bakarrik falta dira, 12 orduko elektronika saioa ospatzeko. Irekia eta doakoa izango da.
Arratsaldeko 18:00tan hasiko dira Gorku/Funk Off! (EH) eta Pilar Jorquera (Chile) Guardetxeko terrazan. Gaueko 22:00tatik aurrera eta THG kolektibo gaztearekin elkarlanean antolaturik, beste 5 DJ arituko dira: Essan, Magnolia, Anderetx, Haley eta Tuber, guztiak donostiarrak Essan izan ezik. Azkeneko hori, eszena elektronikoan geroz eta ezagunagoa egiten ari den Bilboko DJ gazte bat da.
Source: https://www.diariovasco.com/san-sebastian/musika-elektronikoak-beteko-20180814135720-nt.html